ತಿರುವನಂತಪುರಂ: ವಯನಾಡ್ ಭೂಕುಸಿತ ಸಂಭವಿಸಿ ಆರು ದಿನಗಳಾದರೂ ಇನ್ನೂ ಸುಮಾರು 180 ಮಂದಿ ನಾಪತ್ತೆಯಾಗಿದ್ದು, ನಾಪತ್ತೆಯಾದವರ ಕುಟುಂಬ ಸದಸ್ಯರ ಅಪರಿಚಿತ ಶವಗಳ ಡಿಎನ್‌ಎ ಹೊಂದಾಣಿಕೆ ಪ್ರಕ್ರಿಯೆಯನ್ನು ರಾಜ್ಯ ಸರ್ಕಾರ ಆರಂಭಿಸಿದೆ.
ಭೂಕುಸಿತ ಪೀಡಿತ ಪ್ರದೇಶಗಳು ಮತ್ತು ಅರಣ್ಯದ ಉದ್ದಕ್ಕೂ ಸುಮಾರು 40 ಕಿಲೋಮೀಟರ್ ವರೆಗೆ ನದಿಯಲ್ಲಿ ವ್ಯಾಪಕ ಹುಡುಕಾಟದ ಹೊರತಾಗಿಯೂ, ಭಾನುವಾರ ಕೇವಲ ಎರಡು ದೇಹಗಳು ಮತ್ತು ದೇಹದ 10 ಭಾಗಗಳನ್ನು ಮಾತ್ರ ಪತ್ತೆಹಚ್ಚಲು ಸಾಧ್ಯವಾಯಿತು.
ಸರ್ಕಾರವು ಇಲ್ಲಿಯವರೆಗೆ ದೃಢಪಡಿಸಿದ ಒಟ್ಟು ಸಾವುಗಳು 221 ಆಗಿದ್ದು, ಇದರಲ್ಲಿ 97 ಪುರುಷರು, 87 ಮಹಿಳೆಯರು ಮತ್ತು 37 ಮಕ್ಕಳು ಸೇರಿದ್ದಾರೆ. ಸಂಬಂಧಿಕರು ಇದುವರೆಗೆ 172 ಮೃತದೇಹಗಳನ್ನು ಗುರುತಿಸಿದ್ದಾರೆ. ಇದನ್ನು ಹೊರತುಪಡಿಸಿ, 166 ದೇಹದ ಭಾಗಗಳನ್ನು ಸಹ ಚಲಿಯಾರ್ ನದಿಯಿಂದ ಹೊರತೆಗೆಯಲಾಗಿದ್ದು. ಅನಧಿಕೃತ ಸಾವಿನ ಸಂಖ್ಯೆ ಸುಮಾರು 375 ಆಗಿದೆ.
ಅರಣ್ಯ ಪ್ರದೇಶಗಳ ಮೂಲಕ ಕೊಚ್ಚಿಹೋದ ಜನರು ಕಾಡು ಪ್ರಾಣಿಗಳಿಗೆ ಸಿಲುಕುವ ಸಾಧ್ಯತೆಯನ್ನು ತಳ್ಳಿಹಾಕಲಾಗುವುದಿಲ್ಲ ಎಂದು ರಕ್ಷಣಾ ಕಾರ್ಯಾಚರಣೆಯಲ್ಲಿ ತೊಡಗಿರುವ ಅಧಿಕಾರಿಯೊಬ್ಬರು ಡಿಎಚ್‌ಗೆ ತಿಳಿಸಿದ್ದಾರೆ. ಆದಾಗ್ಯೂ, ಈ ಪ್ರದೇಶದಲ್ಲಿ ನರಭಕ್ಷಕ ಪ್ರಾಣಿಗಳ ಉಪಸ್ಥಿತಿಯು ಕಡಿಮೆಯಾಗಿದೆ. ಶೋಧ ಕಾರ್ಯಾಚರಣೆಯಲ್ಲಿ ಒಂದೆರಡು ಸಾಂಬಾರ್ ಜಿಂಕೆಗಳ ಮೃತದೇಹಗಳು ಪತ್ತೆಯಾಗಿವೆ.
ಸೂಚಿಪಾರ ಜಲಪಾತದ ಮೇಲೂ ಹುಡುಕಾಟ ಜೋರಾಗಿದೆ. 2019 ರ ಪುತ್ತುಮಲ ಭೂಕುಸಿತದ ಸಮಯದಲ್ಲಿ, ಸೂಚಿಪಾರಾದಿಂದ ಹಲವಾರು ಶವಗಳನ್ನು ಹೊರಗೆಗೆಯಲಾಗಿತ್ತು. 2019 ರ ಭೂಕುಸಿತದ ಕನಿಷ್ಠ ಐದು ದೇಹಗಳನ್ನು ಇನ್ನೂ ಪತ್ತೆಹಚ್ಚಲು ಸಾಧ್ಯವಾಗಲಿಲ್ಲ.
ಈಗಾಗಲೇ ಅಂತ್ಯಕ್ರಿಯೆ ನಡೆಸುವ ಮುನ್ನ ಅಪರಿಚಿತ ದೇಹಗಳು ಮತ್ತು ದೇಹದ ಭಾಗಗಳ ಡಿಎನ್‌ಎ ಮಾದರಿಗಳನ್ನು ಸಂರಕ್ಷಿಸಲಾಗಿದೆ. ಈಗ, ವೈದ್ಯಕೀಯ ತಂಡವು ನಾಪತ್ತೆಯಾದ ವ್ಯಕ್ತಿಗಳ ಕುಟುಂಬ ಸದಸ್ಯರು ಅಥವಾ ರಕ್ತ ಸಂಬಂಧಿಗಳಿಂದ ರಕ್ತದ ಮಾದರಿಗಳನ್ನು ಸಂಗ್ರಹಿಸಲಿದೆ ಮತ್ತು ಅದನ್ನು ಗುರುತಿಸಲಾಗದ ದೇಹಗಳು ಮತ್ತು ದೇಹದ ಭಾಗಗಳ ಡಿಎನ್‌ಎ ಮಾದರಿಗಳೊಂದಿಗೆ ಹೊಂದಾಣಿಕೆ ಮಾಡಲಾಗುತ್ತಿದೆ.
ರಾಜ್ಯ ಸರ್ಕಾರವು ಪಡಿತರ ಚೀಟಿ ದಾಖಲೆಗಳ ಪ್ರಕಾರ ಕುಟುಂಬ ಸದಸ್ಯರ ಮಾಹಿತಿಯ ಸಹಾಯದಿಂದ ನಾಪತ್ತೆಯಾದವರ ಪಟ್ಟಿಯನ್ನು ಪರಿಶೀಲಿಸುತ್ತಿದೆ. ಸರ್ಕಾರದ ಪ್ರಾಥಮಿಕ ಅಂದಾಜಿನ ಪ್ರಕಾರ, ಮೆಪ್ಪಾಡಿ ಪಂಚಾಯತ್‌ನ ಮುಂಡಕ್ಕೈ, ಚೂರಲ್‌ಮಲಾ ಮತ್ತು ಅಟ್ಟಮಾಳ ಎಂಬ ಮೂರು ವಾರ್ಡ್‌ಗಳಲ್ಲಿ ಭೂಕುಸಿತದಿಂದ ಧ್ವಂಸಗೊಂಡ ಮೂರು ವಾರ್ಡ್‌ಗಳಲ್ಲಿ 1,721 ಮನೆಗಳು ಮತ್ತು 4,833 ನಿವಾಸಿಗಳು ಇದ್ದಾರೆ. ಸ್ಥಳೀಯ ಸ್ವಯಂ ಸರ್ಕಾರಿ ಇಲಾಖೆಯು ಇತರ ಇಲಾಖೆಗಳೊಂದಿಗೆ ಜನರು ಅನುಭವಿಸಿದ ಕಷ್ಟ ನಷ್ಟವನ್ನು ಅಂದಾಜು ಮಾಡುವ ಪ್ರಕ್ರಿಯೆಯನ್ನು ಪ್ರಾರಂಭಿಸುತ್ತಿದ್ದಾರೆ.
ಸಂಪೂರ್ಣ ಶೋಧ ನಡೆಸಿದ ನಂತರ ಮೃತದೇಹಗಳನ್ನು ಪತ್ತೆ ಹಚ್ಚಲು ಸಾಧ್ಯವಾಗದಿದ್ದಲ್ಲಿ, ಅವಲಂಬಿತರಿಗೆ ಸೂಕ್ತ ಪರಿಹಾರವನ್ನು ನೀಡಲಾಗುತ್ತೆ ಅಲ್ಲದೇ ಕಾಣೆಯಾದವರನ್ನು ಪ್ರವಾಹಕ್ಕೆ ಸಿಲುಕಿ ಸಾವನ್ನಪ್ಪಿದ್ದಾರೆಂದು ಘೋಷಿಸಲು ಸರ್ಕಾರ ವಿಶೇಷ ಅಧಿಕಾರವನ್ನು ಚಲಾಯಿಸಲಿದೆ ಎಂದು ಸರ್ಕಾರಿ ಮೂಲಗಳು ತಿಳಿಸಿವೆ.
ಇದೇ ವೇಳೆ ಪುತ್ತುಮಲದಲ್ಲಿ ನಿರ್ಮಿಸಲಾದ ಸಾಮೂಹಿಕ ಸ್ಮಶಾನದಲ್ಲಿ ಅಪರಿಚಿತ ಶವಗಳ ಸಾಮೂಹಿಕ ಅಂತ್ಯಕ್ರಿಯೆ ನೆರವೇರಿಸಲಾಯಿತು.